香港新浪網 MySinaBlog
« 上一篇 | 下一篇 »
曉蕾Leila | 29th May 2009, 11:07 | 採訪背後

 上星期聽到my little airport<給face雜誌的記者ivy>,昨天讀到<君子雜誌>記者daisy寫{不見天的六四專題},我沒資格教行家點做事,以下純粹個人經驗分享.

曾經有將近一年時間,文章不斷被編輯抽起.那是一九九六年在<東方日報>.

報館與民主黨交惡,但凡與民主黨有關的報導,都會被刪掉,當時是民主黨曝光最高的年代,政治新聞沒可能沒民主黨的份兒,政治組阿頭說:照寫,刪掉是編輯部的事,記者就是要盡自己責任公正地採訪及訪導.所有民主黨記者會照去,稿照寫,雖然明知不能出街.

〔當練文筆囉!〕我當時好積極,阿頭氣結:〔唔通我又練文筆!〕

明知報館立場,但不斷爭取:〔咁大件事個個政黨都回應,唔淨在落埋民主黨啦.〕報導有時出到街,有時不.

投訴?向誰?記協無牙亦從來不是老虎,全世界都知道東方蘋果各為其主.

報館曾經要告民主黨議員鄭家富,要求我交出採訪筆記,我拒絕.反正早計劃回歸過後去讀書.

九七年九月去了英國唸書,<太陽報>正要開辦時,招攬電話打到去大學宿舍,九九年回來卻發現因為我曾經不肯協助控告鄭家富,被列入永不錄用黑名單.多方高層遊說頂層不果.

不知怎地,一點也沒生氣,文章被刪,永不錄用,在報界正常過正常,自覺盡了本份,食得鹹魚抵得渴,繼續前行.

自薦進<明報周刊>BOOK B,老頂搞革命出身,在一九九九年還殘餘點點火紅,記得有次去台灣採訪教育改革,回程當日正值總統大選,居然被同事〔篤背脊〕:〔怎不留下觀看?還算曾經當過政治記者?〕<東方>背景是一隻小黑豬,總被嫌棄不夠批判.

但撫心自問:關心的是人情,埋頭寫了一系列飲食故事<香港第一>,不用實地到戰場採訪,也能帶出人文關懷.

四年進<壹周刊>是看在陳惜姿份上,起初只肯寫旅遊,陳惜姿離開時問要否轉去寫人物,想了一晚,拒絕了.若然仍是陳惜編輯,還可一試,否則一旦壞了名聲,如何是好?

我是決定一世當記者的,不打算賺兩年錢然後轉行.

回望,曾經閃過後悔,或者當時可以幹出成績來,起碼應該嘗試利用其發表空間.....但我EQ沒陳惜姿高,估計很難保留全屍.

明白自己的路,愈行愈窄,但如果不是自己想走的,走下去做什麼?記者命賤如斯,若非真心喜歡,轉行便是.

可是如果選擇繼續,就要懂得狡猾.

明知商人辦報,一定要諗計仔,反正訊息直直寫出來,也只能吸引立場相同的讀者,叫破喉嚨也只是那一群人,要擴大戰線,一定要細心經營,吸引更多讀者,例如環保故仔,要很小心想新角度,才能有影響力.而六四等敏感題目,明知老細向錢看,更得找出那條高層不為意或管不了的縫兒.

打鑼打鼓寫不了,就要悄悄地滲.最好如煮青蛙,慢慢煲.反正鑼鼓也是一聲,過後沒人記得. 

當然難,你看廣告業是一盤大生意,要利用大眾傳媒傳遞訊息,好多技巧.

但最最最重要,還是保持那顆心,做記者可以笨,但不可以無心.

有心,總會想到點子,沒有心,文章大賣也不是自己真正相信的.

daisy&ivy,後者會比前者難行,明刀明槍還能叫一聲,迷魂毒藥不由自主,連自己也選擇服從,嘴巴照怨,薪水照領,然後快快轉行如歌詞,近這十年,傳媒就是如此失去一批又一批新力軍,專業界線更模糊,更無時間練本事.

實情轉工也無分別,天下烏鴉一樣黑,你以為壹傳媒高姿態支持民主,沒有市場考慮?撫心自問:是否真的想當記者,若不轉行,好好練功,玩番轉頭.

尤其如今青黃不接,大量稿件老細怎能份份審查,一份報紙萬千錯漏,隙縫何其多!

有心者,一起練功.

http://daisyne.xanga.com/  (不知稍後會否抽起,原文轉載於此)

 

不見天的六四專題Tuesday, May 26, 2009

前一天還慶幸自己在一家包容性和多元性皆強的雜誌工作。

六四專題難做,lifestyle 雜誌的六四專題更難做,論政治性新聞性,我們不比跟日報比媲,想義正嚴詞大呼平反六四又怕老氣橫秋,經過不斷的推倒重來,我們找到了方向,並實踐了。

文章寫好、相片拍好、layout 砌好,甚至已經送往印刷,但最後,因為大老闆的一個電話,專題被抽掉,同時,有關該期雜誌中所有提及六四字眼的文章,皆要經過修改,三小時之後,這個六四專題真的可以消失得無影無踪,彷彿從未出現過。

然後,一個狐假虎威的公司高層,把我和幾位相關的同事叫到會議室,會議室氣氛很凝重,我們似是犯下彌天大禍。那名高層手拿著那份專輯的 copy,上面的文字被黃色的螢光筆畫得一塌糊塗,然後她將「有問題」的句子逐句讀出,說:「這是煽動。」當然還有一堆不知所謂的說法,包括公司的決定毋須要向員工解釋,若有不滿同事可以隨時離職等屁話,還假猩猩的問大家有何意見。

他媽的我還可以有甚麼意見,你是老闆,你說了算,但她居然還說我像是不認同公司立場,我是打工,但不是你的走狗,無須甚麼屁都要與公司同一立場吧!你有權禁止你認為有損害公司在內地生意利益的東西刊出,你有權炒我,我有權不做,但是你不必像文字獄般逐隻字審查我那一字有煽動成份,這裡是香港,不是大陸,而且即使這份專題寫著我名字去大陸派我也不信有人要捉我去打把,別弄得像是我們犯了殺頭般的大罪似的。

撫心自問,是次六四專題的文字圖片內容,不算處理得特別出色,當中也沒有甚或驚天動地的內幕要爆,但是我不憤。

好可怕。我原本覺得壹傳媒偏激,但我發現,原來香港剩下願意咆哮聲音的,或許只有它了。

好可怕。原來沒有人抹殺香港的新聞和言論自由,是我們的媒體集團為利益甘願放棄。

好可怕。從前覺得內地用強硬的手段,又捉又打又軟禁的,控制人們的言行,好可怕,之後感覺近年好像好了點,到奧運時又好像再好了一點。但現在,我發現,原來軟霸權更可怕,中國強大了,他們不必再用任 physically 的手法打壓人們,只要不讓你回國經商,那麼想賺錢的人們便會乖乖收聲。我感覺如此情況還將繼續發展,中國好野!

2009年5月26日,《君子雜誌》的 143 至 156 頁被他們抽走了,但他們不能在日曆上抽了六月四日。感謝歷史讓我們看清商人的真貌。


[1]

嘩! 你好得喎, 黑名單都上埋, 其實黑名單個真正名稱系叫"英雄榜", 即系話你萬中無一, 好有種, 唔易上架. 不過我以前都攞唔少啦, 去都邊攞到邊, 好似受fun咁.

你要明啦, d老細帶住成班伙記, 個個擘大個口話要開飯, 呢d系老細佢地既限制, 雖然佢開口丙你, 但系可能佢心底都好 buy 你果套架. 家陣我向全港老總含淚勸告同呼籲, 曉蕾其實系好有 heart 既記者, 系人才黎, 唔好誤會佢, 問題系睇你地識唔識用佢啦.

老總們, 你地唔好再為燒路而煩腦喇, 家陣金滆海嘯, 你地印嘜比人睇, d人都系睇唔入心架啦, 放鬆d啦, 由得d馬仔中意寫嘜咪寫嘜囉, 寫錯字都唔好打頭呀, 可能佢地有創意, 有heart, 有驚喜, 令你地出版燒路大增都未定呢.


[引用] | 作者 Paul | 29th May 2009 16:36 | [舉報垃圾留言]

[2] 懂得狡猾

好!

殺人手段,救人心.


[引用] | 作者 開始做事 | 29th May 2009 19:25 | [舉報垃圾留言]

[3]

世有伯樂, 然後有千里馬. 有才華既人, 始終都會有人賞識既. 世界在變, 人生都要變啦, 社會多元聲音同包容度都系度不斷提升緊. 人生苦短, 你自己覺得岩既野, 咪趁住年輕就付之行動囉, 唔系弟日就後悔莫及架喇, 當然咁樣做要好有勇氣至得. 我都好佩服你既堅持同勇氣既.

果個愛恩斯坦細個既時候, d老師都頂佢唔順啦, 大學畢業更加都搵唔到好工, 佢當時咁講: 突然被一切人拋棄,一籌莫展咁面對人生. 最後咪又遇到伯樂, 佢既才華仲震驚全世界添.


[引用] | 作者 Paul | 29th May 2009 20:17 | [舉報垃圾留言]

[4]

走自己想走既路, 永遠都系孤單既路黎, 可能無一個人會明白你, 就算有都系極少既. 但系如果唔走, 抱憾一生. 人生唔系一定要成功, 但系要活得有意義. 我覺得你都可以試吓d新既工作, 又或者多方發展, 你仲後生, 唔岩咪翻轉頭做記者囉.


[引用] | 作者 Paul | 29th May 2009 21:09 | [舉報垃圾留言]

[5]

系未來既創意世界裏頭, d人同人既關係會變得cool D, 不過又會維持住好大既人際網絡. 到時再冇人會質你丙你, 大家都尊重對方講既野, 不過d生活態度可能會騎呢咗d, 多元文化嘛. 要中國人變成咁唔易, 因為佢地個 family bond 好勁, 不過遲早都會變既.

到時你甚至可以自己做埋老細, 唔洗打人工受人氣喇. 社會上既人大都會系做 freelance, 做完一個 job 就放大假去玩, 好輕鬆架. 而且個個人都會好有性格, 好似你而家咁既樣. 呢種系全球趨勢, 冇得翻轉頭架喇, 翻轉頭果d咪叫落後囉.


[引用] | 作者 Paul | 30th May 2009 06:46 | [舉報垃圾留言]

[6]

嘩! 睇完報紙至知道原來呢單野搞到咁激既, 唔知今暈我冇份入英雄綁呢, 真系好刺激喎, 有心撞病既唔好入黎勒.

不過一單還一單啦, 有才華既記者, 你地班老總都要靠晒佢地寫d精彩, 多元化既野去吸引讀者, 推動文化創新嘛. 都話事實始終系事實咯, 你點樣去解釋或者唔解釋都系事實啦.

你炎我煩都要講多次架勒, "要好好咁對待記者呀" 一萬個唔該, 拜託啦 !!!!!!!!!!!!!!!!!!!!! 仲要比多d機會佢地發揮呀.


[引用] | 作者 Paul | 30th May 2009 09:49 | [舉報垃圾留言]

[7]

拿, 講句公道話, 今時今日, 做社會領袖做老細既要"公正"至可以服眾. 文化既野唔簡單, 好複雜, 又系藝術黎, 表達既形式同手法可以千變萬化. 所以咪唔系人人都接受倒囉, 不過呢個正系佢既特色黎. 創意世界有一樣野唔易做, 但系就一定要有, 呢樣野咪叫做"包容"囉.

如果社會上每個人都可以好自由咁發揮倒自己既長處, 咁個社會既文化咪有創新囉. 呢d咪系我地既軟實力囉.


[引用] | 作者 盟化人 | 30th May 2009 12:14 | [舉報垃圾留言]

[8]

你地班社會賢達, 真系要好好咁對待記者呀. 事關佢地唔單指系報紙雜誌有影響力, 系個網度發揮既力量都唔少野架.

時代唔同喇, 好似果個不收蝙蝠既村婦, 唱幾首歌就吸引倒全球過億人既注意力. 如果記者系網寫野, 吸引力同影響力仲大啦, 再加上如果吸引咗個精神病漢入去亂咁up野, 分分鐘引發妄樂海嘯添.

如果比我做咗傳媒大亨既話, 我就一定會立法規定記者既起薪點由六萬起, 年終花紅25%, 一定有長俸, 一年一個月大假, 仲有...蝙蝠有限, 講唔得晒, SORRY.. 如果佢地寫錯字, 都唔好打佢個頭, 最多都系罰佢抄100次就算, 不過唔系用紙筆抄, 而系用電腦抄. 我刀間中寫錯字啦, 唔知點解明明寫緊果樣野, 表達出黎變咗弟樣野咁, 睇到 d 人心跳加速, 標晒冷汗, 口吐白沬咁濟. 唔知我系唔系患咗思覺失調呢, 成日刀心筆在言咁既.


[引用] | 作者 Reportersssss | 31st May 2009 11:18 | [舉報垃圾留言]

[9]

吳老闆做的太好了!!!

你們的甚麼64專輯就算真的出了街,論批判性總也不及大眾傳媒,估計也是懶有角度搵幾條友up幾up再拉D大相便收工,老實講你可以在《君子》上睇到有幾64?

但如今由老細親自下令做野,反而使豎子成名,一本lifestyle賺錢機器,竟然引發大家對傳媒自我審查的省思。個人覺得,吳老闆即使在傳媒行業中臭名遠播,這一次他卻是對極了,佢全家原來是民主無間道,歷史將會還他一個清白。至於那位64烈士,算了吧,如果你根本不了解爛牙全霉,根本就沒資格扮勁,請你問一問傳媒中人,這是一間什麼機構,所有人都可以答你:屌!


[引用] | 作者 紅生 | 31st May 2009 18:24 | [舉報垃圾留言]

[10]

差d唔記得咗果班 freelance 既記者添, Sorry.

拿, 講句公道話, 班老細應該將稿費加碼, 總之要保障倒 freelance 果班記者平均每個月六萬四蚊既生活水平啦. 如果佢地出書, 就一定要無限量咁支持, 跟住六四分賬啦, 如果唔夠就傾到夠為止啦.

唔好話我唔醒吓你地班老細, 呢班記者其實系創意新貴黎架, 系推動文化創意產業既中流底柱黎, 千祈唔可以待薄佢地呀. 知冇?


[引用] | 作者 存媒大亨 | 1st Jun 2009 11:02 | [舉報垃圾留言]